港聞

港聞二

下一篇
上一篇

談鴕鳥論 唐英年:係無眼睇

【明報專訊】保安局長李家超早前為《逃犯條例》修例解畫,形容歷屆政府「鴕鳥咗22年」,無處理移交逃犯制度問題。李家超噚日出席香港友好協進會座談會解釋修例,對於呢番鴕鳥論,協進會會長、曾任政務司長嘅唐英年,會後講笑話過去三任特首唔係鴕鳥,而係「無眼睇」,強調每屆政府都有優次緩急,唔係將戰線「拉到鬼咁闊」嚟做事,否則會四面受敵。

唐英年被問到鴕鳥論時愈講愈起勁,話每屆政府精力有限,會揀幾項重要事嚟做,重提自己任財政司長同政務司長時嘅政績,舉例佢制定過4份財政預算案,幾開心令政府由每年400幾億元赤字,改善到有500幾億元盈餘,「以後十幾年財政司長份工都好易做,因為打咗好好基礎,以後就(只)諗住點樣派錢,唔使諗點去搵錢」。

現場記者聽到唐英年講得興起,乘機繼續追問,有人問佢聽到鴕鳥論後,有無覺得唔開心呢?唐英年笑住話無覺得唔開心,仲話記者有心挑撥離間𠻹。

相關字詞﹕李家超 唐英年 逃犯條例

上 / 下一篇新聞