港聞

港聞二

下一篇
上一篇

西九藝術天橋 日常護養料年花95萬

【明報專訊】政府計劃喺西九文化區興建一條長約94米嘅「藝術廣場天橋」,連接西九文化區以及圓方商場,呢條橋曾被批評為「天價天橋」,政府修改設計後都要2.8億元,平均每米造價約298萬,拍得住平均每米造價約315萬嘅17億元朗行人天橋。條橋除咗造價貴,起好之後嘅營運成本都唔平,政府交畀立法會嘅最新文件顯示,呢條橋日常清潔及植物護養等每年就要95萬元。

每年經常開支300萬

立法會工務小組今個月用咗兩次會議,討論包括藝術廣場天橋在內多項涉及西九文化區嘅工程。民政事務局之前提交工務小組嘅文件已透露,估計行人橋引致的每年經常開支為300萬。公民黨楊岳橋喺上星期嘅工務小組上已提出質疑,認為每年要用300萬維護行人橋,唔係小數目。

民政事務局噚日向工務小組提交補充資料,解釋行人橋嘅每年經常開支主要包括電費丶日常清潔、檢查維修天橋結構、檢查維修升降機同自動扶梯,以及植物護養費用。當中最貴嘅一項係「行人橋結構及附屬設施」,即係日常清潔同植物護養,每年要95萬元。不過貴唔貴都好,工程前日已獲工務小組通過,預計2021至2022年度完工。

相關字詞﹕民政事務局 天價天橋 西九文化區 藝術廣場天橋

上 / 下一篇新聞