港聞

港聞二

下一篇
上一篇

胡志偉罵特首 平機會:言論不恰當

【明報專訊】民主黨主席胡志偉上周喺特首答問大會向林鄭月娥大叫「你唔死都冇用,八婆」,惹來熱議,事後有團體去平機會請願要求跟進。平機會噚日發聲明話,事件唔屬於《性別歧視條例》涵蓋範圍,未能進一步跟進,但就認為言論唔恰當同唔禮貌,唔尊重對方,係以貶詞攻擊特首女性身分,有違男女平等應互相尊重等核心價值。

胡志偉噚日早上喺商台節目《在晴朗的一天出發》解釋,話特首林鄭月娥當時輕視所有人對《逃犯條例》嘅憂慮,又將其他人嘅憂慮當係「廢話」,放棄香港核心利益,令佢憤怒,重申當時咁鬧佢係恰如其分。

上星期六修訂《逃犯條例》法案委員會民主派同建制派議員爆發衝突,兩營議員都有受傷。民建聯陳恒鑌(Ben)同葛珮帆(EQ)分別整親膊頭同頸背,EQ噚日話𠵱家仲係好痛,坐得耐就要食止痛藥,要睇中醫做針灸。至於當日要保安包紮三角巾、事後醫生證實係肌肉繃緊同軟組織受壓嘅阿Ben,就仲睇緊跌打。有中藥界朋友就送上鎮痛貼,兩人話估唔到做議員要捱得打,仲要識得打「木人巷」先入到去開會喎。

相關字詞﹕八婆 葛珮帆 陳恒鑌 平機會 林鄭月娥 胡志偉

上 / 下一篇新聞