港聞

港聞二

下一篇
上一篇

泛民提案減林鄭人工 何君堯:做得好更應加

【明報專訊】立法會正審議《2019年撥款條例草案》,財政司長陳茂波出席聽議員意見,但佢開會時一度低頭用電話,因咩事咁唔專心?原來財爺忙住發WhatsApp短訊畀議員為財政預算案箍票。Emily見佢親自打短訊,雖然傳畀議員嘅內容一式一樣,但會逐個改番人名。佢喺短訊中不忘關心議員工作辛苦,仲話「您的肯定,會鼓勵我們整個團隊繼續全心全力為香港打拼」。

財爺發訊議員為財案箍票

噚日立法會辯論由民主黨主席胡志偉提出嘅削減特首林鄭月娥全年509萬元薪酬修正案,唔少民主派大表支持,批評林太推動修訂《逃犯條例》唔聽民意。建制派何君堯就批評佢哋無理取鬧,仲話林太同問責官員勤力為香港人服務,「做得好更應該打賞,應該加人工」,又話下年會考慮提出呢個建議。但唔知何君堯有無留意到,議員係唔可以隨便提出增加政府開支嘅修正案。

何君堯會上又重提最近兩次《逃犯條例》法案委員會衝突,話覺得相比起林太,更應該減民主派議員人工。佢愈講愈激動,又話民主派係「人渣」、「豬噏當秘笈」。公民黨郭家麒就批評林太要修訂《逃犯條例》,港人可能會被送到內地接受唔公平審訊,做法係送港人去死,支持要減林太人工。

相關字詞﹕林鄭月娥 何君堯 陳茂波 財政預算案

上 / 下一篇新聞