港聞

港聞二

下一篇
上一篇

公民黨幹事蔡素玉義工母親節爆衝突

【明報專訊】立法會議員上演激烈「爭位戰」,類似情况喺地區都有發生。今年有區議會選舉,唔少政黨地區樁腳都喺早兩日母親節擺街站,送鮮花或禮物畀街坊,有意喺東區錦屏出戰嘅公民黨社區幹事李予信,最近喺facebook上載咗一段片,內容係母親節佢擺街站派禮物時,同當區區議員、民建聯蔡素玉嘅義工發生爭執。

李予信:常被騷擾 蔡:公說公有理

李予信同Emily講,周日擺街站派環保餐具畀街坊,隔籬係蔡素玉嘅街站,蔡嘅義工見到佢擺街站,隨即擺張枱喺路中間,阻止街坊行近李嘅街站,之後並用自己張枱撞向李予信張枱度,但唔小心推跌咗自己張枱。義工情緒似乎好激動,踢咗自己張枱兩腳,張枱隨即沿斜路瀡走。李予信話,當日佢再去另外幾個位擺街站,同一個義工都繼續跟住佢,喺佢街站旁邊叫囂,而類似情况之前出現過多次。

Emily聯絡過蔡素玉,佢承認片中人係佢嘅義工,而當日佢有其他活動,所以唔在場。蔡話現場環境狹窄,大家做嘢時發生衝突,形容係「公說公有理、婆說婆有理」,唔希望大家將件事放大;又強調佢有問過義工,得番嚟嘅版本同李予信所講嘅唔同。Emily追問義工所講嘅版本係點嘅呢,蔡就話「唔需要同你交代」。

相關字詞﹕蔡素玉 李予信 民建聯 公民黨

上 / 下一篇新聞