港聞

港聞二

下一篇
上一篇

再撞開會 建制克制 何俊賢收口避戰線 陸頌雄被大佬拉走

【明報專訊】上周六立法會修訂《逃犯條例》法案委員會建制泛民混戰,各有人受傷,噚日雙方各自承認嘅委員會再次「撞會」,但議員表現克制好多。上次被指出手推新民主同盟范國威嘅民建聯何俊賢,噚日收口又收手,無做石禮謙「護法」,避開「戰線」;而說話惹火嘅工聯會陸頌雄噚日同區諾軒嘈咗兩句,即刻被大佬黃國健拉走,黃無佢咁好氣咁叫陸頌雄「唉行啦」。

民主派議員噚日都有明顯部署同分工,擺位清晰。先有譚文豪、許智峯通宵留守會議室外,其餘議員亦喺7點半前返到,再聚集喺會議室1同洗手間外位置開會。接近8點,保安員開鎖後,就由穿著便服嘅林卓廷同尹兆堅搶攻主席台,鄺俊宇、毛孟靜同葉建源亦有幫手霸位。

民主派擔櫈仔守門口 防建制轉場

至於衝擊建制派同抗議行動,就由郭家麒同區諾軒做主力,建制派由走廊行近會議室,佢哋就一路開咪嗌「非法會議」。石禮謙行入會議室後隨即被包圍,朱凱廸同區諾軒就沿用上次做法,企上枱抗議,其間許智峯企圖搶走石禮謙支咪不果。之後,建制派拉大隊離開會議室1,梁耀忠、陳志全、葉建源、譚文豪、黃碧雲就擔櫈仔當「看更」,守住會議室2門口,以防建制派轉場入去開會。

鄭泳舜張國鈞保安做石禮謙護法

建制派方面,上次負責做石禮謙「保安」嘅周浩鼎、陸頌雄、何俊賢同張華峰,噚日無份,交由鄭泳舜、張國鈞同幾個立法會保安負責。石禮謙進入會議室時並無跟建制派大隊,而係經消防通道行落2樓,全程有貼身保護。

上 / 下一篇新聞