港聞

港聞二

上一篇

頒獎學金一面之緣 楊潤雄恭喜包山后

【明報專訊】山上一分鐘,山下七年功,噚日誕生嘅「包山后」龔子珊(Janet),玩過7年長洲太平清醮「搶包山」比賽,今屆終於成功封后。佢噚日喺facebook話「今年終於上到九分包位置」,清楚自己要點做,成為包山后,多謝各位祝賀。教育局長楊潤雄都喺facebook恭賀Janet,而原來Janet係今年政府「才藝發展獎學金」獲獎學生之一,佢上月接受政府新聞網訪問,已提到希望爭取包山賽奪冠。

龔子珊盼用獎學金赴外國訓練

楊潤雄喺4月底嘅獎學金頒獎禮見過Janet,並一齊合照。佢話記得Janet當時仍努力為「搶包山」比賽做準備,好高興Janet能夠達成夢想,希望佢繼續進修同訓練,再創高峰,又鼓勵其他同學都要為興趣同夢想奮進。

本身係公開大學護理學五年級學生嘅Janet,因體育運動表現出色,獲頒「才藝發展獎學金」,佢喺訪問話自己對攀爬運動有興趣,好似攀冰、攀石,希望用呢筆獎學金去外國訓練,日後代表香港參加唔同嘅國際比賽,拎更好成績。

上 / 下一篇新聞