港聞

港聞二

下一篇
上一篇

陳健民獄中教英文 戴耀廷答法律問題

【明報專訊】佔中9人案上月24號宣判,其中兩名佔中發起人戴耀廷同陳健民被判囚16個月,正在服刑,民主黨屯門區議員朱順雅噚日喺facebook話,前幾日先後到石壁同壁屋監獄探望兩人,形容佢哋精神非常好,笑容依舊,並引述兩人話,從新聞報道得知有十幾萬人上街抗議政府修訂《逃犯條例》,感到好鼓舞,希望市民繼續企出嚟守護香港。

陳住30人倉 囚友體諒免食二手煙

朱順雅引述陳健民話,佢現時被囚於30人倉,囚友非常善待同尊重佢,即使同倉九成囚友都食煙,但食煙時會盡量遠離佢,避免佢吸二手煙;陳健民為保持身體健康,每日堅持運動,習慣咗清晨5點幾起身坐禪同慢跑,日間佢會被分配做木工,夜晚就閱讀,亦會幫啲囚友補習英文。佢仲講笑話要喺獄中努力工作,希望盡快掙夠錢買對「白飯魚」布鞋去跑步。

至於戴耀廷,朱順雅引述佢話目前囚喺二人倉,同倉囚犯好照顧佢,令佢總算適應獄中生活。佢會善用逢星期三可以出去跑步嘅下晝,每次環繞足球場慢跑40分鐘,大約跑廿幾圈;平時就被分配到裁衣部門,負責剪線頭。由於佢有港大法律系教授背景,唔少囚友都向佢請教,佢都樂意逐一解答。

朱順雅話佢哋好掛心其他戰友,已告知兩人最新狀况,包括邵家臻「通波仔」手術後,已被送返赤柱監獄服刑;陳淑莊都順利完成開腦手術,目前休息緊。兩人聽到都鬆一口氣。

相關字詞﹕佔中案 朱順雅 陳健民 戴耀廷

上 / 下一篇新聞