港聞

港聞二

下一篇
上一篇

陳克勤指控推保安 林卓廷叫屈:當我張無忌?

【明報專訊】立法會上周六因《逃犯條例》引發議員衝突餘波未了,事後兩陣營嘅人都剪輯上載片段,互斥對方不是,並去報警互指對方襲擊。民建聯陳克勤就喺facebook上載短片,聲稱見到民主黨林卓廷一邊勸交、一邊用手推過保安員;不過,林卓廷就直呼「老屈」,話唔該屈佢都做得高質素少少,而當時只係為咗保護大家唔好跌落梯級咋。

話為保護議員唔跌落梯級

上周六混亂期間,民主黨胡志偉情緒激動,走去建制派「師兄」石禮謙度,喊住叫佢唔好開會。據陳克勤上載嘅片段,當時林卓廷企喺胡志偉後面,面前有幾個保安員阻擋胡前行,陳克勤就留言話,「泛民特色勸交:各位有冇見過有人一邊扮和事老,但一邊出手推走保安員?仲一步一步向前行? 睇下呢位前調查員,你就知泛民的卑劣」。

林卓廷就回應,話同屬新界東選區嘅陳克勤「老屈」。佢解釋,當時見到胡志偉同保安員有觸碰,而佢哋無為意退後幾步就有一級樓梯,所以出聲勸大家冷靜,保護胡志偉以免後墮受傷。林承認過程拍咗保安員心口一下,示意對方唔好逼前;佢反問陳克勤係咪以為佢係張無忌,練成「乾坤大挪移」,可以單掌震開胡志偉加3個保安?仲叫陳克勤「咪癲啦」,又斥民建聯「仲當人雙目失明」。

上 / 下一篇新聞