港聞

港聞二

下一篇
上一篇

尖嘴電影導賞團 重遊凌凌漆王家衛取景地

【明報專訊】「你book嘅唔係麗晶酒店,你book嘅係麗晶大賓館。」唔少影迷對周星馳主演嘅《國產凌凌漆》呢句對白好熟悉,套戲當時就喺𠵱家叫香港洲際酒店嘅麗晶取景。文化機構「活現香港」同新世界發展嘅星光大道管理有限公司合辦「香港電影之旅:尖沙嘴」導賞團,上月起推出,至9月每逢周六帶大家重遊約20套喺尖沙嘴取景嘅電影場地。

每周六帶團至9月 尋訪逾20戲足迹

Emily跟「活現香港」創辦人陳智遠(Paul)行過其中幾個地方,行到洲際酒店門外,Paul重提《國產凌凌漆》中周星馳搞錯入住酒店一幕,佢話請教過熟悉電影嘅朋友,原來「凌凌漆」被國家安排來港入住嘅麗晶大賓館,據考究係荃灣一幢舊樓。

行到半島酒店同太空館一帶,Paul話由張國榮、舒淇主演嘅《色情男女》,舒淇同徐錦江喺電話亭中纏綿嘅一幕,就喺太空館外嘅行人路拍攝,以圍觀市民作臨時演員;半島酒店頂樓嘅直升機停機坪就拍過《蝙蝠俠——黑夜之神》。

王家衛嘅電影同尖沙嘴都好有淵緣,除為人熟悉嘅《重慶森林》,仲有《墮落天使》。Paul話戲中麥當勞嘅場景係「駁景」,即係門口影住北京道嘅麥當勞,鏡頭一轉,店內其實喺星光行嘅分店取景。

Paul自稱「半個電影癡」,話導賞團籌備咗約半年,吸引到台灣同內地客參加,佢認為導賞團唔止懷緬過去,而係從尋找電影足迹認識香港嘅文化影響力。Emily喺度補充一下,據月前報道,洲際喺完成翻新後重新發展成麗晶酒店,恢復原名。

相關字詞﹕尖沙咀電影導賞團 活現香港 星光大道 emily

上 / 下一篇新聞