港聞

港聞二

下一篇
上一篇

戰火蔓延 內會會議紀要都要激辯投票

【明報專訊】《逃犯條例》修例戰火蔓延至立法會各大小事務,連噚日內務委員會討論通過會議紀要,都引嚟一番激辯。事緣日前陪同一名女保安指控秘書處「政治審查」嘅公民黨譚文豪,噚日質疑秘書處撰寫嘅會議紀要,以「民主派」而非黨籍標籤議員,係咪有欠中立,爭論一番後最終罕有需要以投票表決,獲建制派支持下通過紀要。

譚文豪質疑秘書處標籤議員

呢份會議紀要記錄上周五(3日)內會例會會議,秘書處提及混亂情况時,形容「數名民主派議員在座位上高聲說話」。譚文豪質疑,秘書處係咪要將議員分「藍絲」同「黃絲」,佢強調秘書處將議員標籤屬邊個黨係無問題,但唔應該寫埋議員嘅政治取態。秘書處喺會上強調,過往一直以呢個做法處理會議紀要。

平時只需半小時就開完嘅內會會議,噚日足足用咗3倍時間,呢份會議紀要最終罕有地要透過投票確認。譚文豪批評透過投票通過有爭議內容嘅會議紀要並不妥當,舉例話如果秘書處將2019年寫成2015年,內會係咪都可以透過投票嚟通過紀要呢?不過紀要最終都係付諸表決,喺建制派支持下獲通過。

上 / 下一篇新聞