港聞

港聞二

下一篇
上一篇

容海恩叫B女唔好識黃色 其他都要識

【明報專訊】新民黨立法會議員容海恩(Eunice)同該黨南區區議員陳家珮(Judy)噚日一齊帶各自幾個月大嘅BB女見記者。Judy個女Hannah𠵱家4個月大,比Eunice個女昌蔚大一個月。兩個媽媽互送禮物畀對方嘅BB,Judy送咗個玩具琴仔畀昌蔚, Eunice捉住昌蔚隻手仔彈落七彩琴鍵上,仲教定個女「你唔好識黃色就得喇,其他都要識」。兩個BB眼仔碌碌咗一陣,就無視周圍嘅聲音瞓着咗,昌蔚仲要邊瞓邊食奶。

囝囝呷醋 要求Judy「放低妹妹」

Hannah好鍾意咬手仔,Eunice送咗個毛巾公仔畀Hannah,話可以咬到好多年,又大爆自己都「咬毛巾咬到6歲」。Judy仲有個囝囝,比Hannah大兩歲。Judy話囝囝好想幫手湊妹妹,會幫手攞尿片畀妹妹換,但當然都有呷醋嘅時候,要求媽媽「放低妹妹」。咁Eunice會唔會想追多個小朋友?Eunice話要考慮自己有冇時間湊,老公都冇出聲話要追多個。Eunice笑言昌蔚個樣似足老公袁彌昌,不過Judy讚昌蔚對眼大過爸爸。

話𠵱家立法會係不安全工作地點

Eunice早排帶過昌蔚入立法會,今日修訂《逃犯條例》嘅立法會委員會繼續鬧雙胞胎,大家預期出現經民聯石禮謙同民主黨涂謹申爭主席位嘅情况,會唔會再帶昌蔚嚟睇熱鬧?Eunice話𠵱家立法會係「不安全工作地點」,唔適宜帶BB現身喇。佢笑言,可能要將B女放喺主席位上面幫手霸位。

上 / 下一篇新聞