港聞

港聞二

下一篇
上一篇

料年底動工 佐敦谷明渠活化 設觀景台賞花

【明報專訊】渠務署4年前展開顧問研究,評估全港主要河道同明渠嘅活化潛力,Emily兩年前同時任渠務署長唐嘉鴻傾過,佢當時話初步研究顯示首批有5條河入圍,包括佐敦谷明渠,由於呢條明渠只係長約200米,當時預計工程費用喺3000萬元以下,唔使向立法會申請撥款,所以會先爭取展開活化。Emily留意到,署方近日就呢條明渠活化諮詢區議會,計劃今年底動工,2022年完工,但未喺文件透露工程成本。

署方喺文件話,活化水體可以美化環境,仲可以令河溪生態多元化。據顧問研究,佐敦谷明渠上游環境幽閉,適宜做生態改善工程,促進生物多樣性,會加設水池同魚梯;下游近佐敦谷遊樂場同佐敦谷游泳池嘅休憩空間,所以會做園境美化,如有粉紅杜鵑、小葉馬纓丹。署方又話,會喺明渠上面興建觀景平台,提供休憩空間。

促進生物多樣性 設水池魚梯

觀塘區議員顏汶羽話,佐敦谷明渠嘅臭味困擾區內居民幾十年,希望工程快啲上馬,加快進度,亦希望活化工作可以建立生態系統,紓緩明渠嘅臭味。

相關字詞﹕佐敦谷明渠活化 渠務署 emily

上 / 下一篇新聞