港聞

港聞二

下一篇
上一篇

叫政府追聯國11億債 石禮謙又講逃犯例

【明報專訊】負責研究審計報告嘅立法會政府帳目委員會跟進緊30項議題,噚日就翻舊帳,跟進其中8個議題。年代最遠久嘅,莫過於港府要追討1980至90年代暫支畀聯合國難民事務高級專員署應付越南船民問題嘅逾13億元,至今署方只係還咗1.66億元。帳委會主席石禮謙話,有信心保安局長李家超會跟進呢件事,「20年,都要填補(逃犯條例)法律空隙,相信佢都會填補呢11億嘅空隙」。

呢個問題其實早於1998年審計報告已經提出,不過至今都未圓滿解決。帳委會副主席、專業議政立法會議員梁繼昌就話,保安局舊年已經再去信聯合國難民署要求還錢。

民主黨林卓廷就覺得,聯合國難民署咁多年都還唔到錢畀香港,相信就算將來有錢,都會先用嚟解決全球難民危機,形容呢筆欠款係「爛帳」,質疑政府再花資源追數只會帶嚟更大虧蝕,叫政府認真考慮吓撇帳。

11億睇嚟爛帳 林卓廷倡撇帳

委員會噚日提出跟進8個舊議題,仲包括為長者提供嘅長期護理服務、路旁環保斗嘅管理、航空交通管制同相關服務等。跟進議題又有無優次之分?石禮謙強調無優次之分,仲話今次係第一次公布委員會仍然跟進嘅議題,希望令帳委會工作「陽光化」喎。

相關字詞﹕越南船民 石禮謙 聯合國難民署 帳目委員會

上 / 下一篇新聞