港聞

港聞二

下一篇
上一篇

自動吸水噴水清泡沫 5分鐘洗頭機 長者讚舒服

【明報專訊】頭髮冲涼呢啲每日「指定動作」,對行動不便嘅「老友記」嚟講可能係一大考驗,不過𠵱家有新技術幫到手。香港有安老院舍最近引入由日本研發嘅手提式「洗頭機」,附設「花灑」可以吸水噴水,長者唔使郁,坐喺度都可以洗頭,5分鐘搞掂,慳咗照顧員唔少工夫。有用過嘅老友記讚好,形容「好似去咗飛髮舖咁舒服!」

噚日喺貿發局第10屆「國際醫療及保健展」記者會,Emily有機會先睹為快部分展品,其中一款手提式「洗頭機」吸引唔少人。話說呢部機舊年由香港分銷商由日本引入,目前嗇色園都有院舍同長者中心用緊,分銷商負責人同Emily講,好多老人家冬天或者身上有傷口,唔方便除衫或者移動去浴室洗頭,洗頭機就可以幫到佢哋喇!

安老院引入 免長者去浴室

至於使用方法都唔複雜,照顧者先喺洗頭機裝水,再為長者整濕個頭,用洗頭水搓一搓,之後開着部機,噴頭會自動吸水噴水清洗泡沫,大約5分鐘洗好。不過,Emily見到洗頭機駁住吸塵機,到底點解呢?負責人話吸塵機係提供動力「吸引水流」,但強調用水唔會經過吸塵機,但如果大家都係驚污糟,佢哋亦有將洗頭機連吸塵機一套發售,價錢大約5000蚊。

如果大家有興趣,可於下星期二至四去會展參觀展覽,現場有285家展商,介紹創新醫療或護理器材。無獨有偶,社會服務聯會噚日推出介紹呢款「洗頭機」片段,有長者大讚「好新奇、好舒服,成個人好放鬆,好似入咗飛髮舖咁」。Emily就覺得呢部機除咗幫到老人家,或者都幫到唔少嫌麻煩嘅人,話唔定以後會變「洗頭神器」。

上 / 下一篇新聞