港聞

港聞二

上一篇

7卡車換8卡車 西鐵線續迫爆

【明報專訊】相信大家同Emily一樣,繁忙時間搭港鐵通常都會「迫爆」,其中西鐵線近年逐步由7卡車增至8卡,但隨住「大西北」人口愈來愈多,西鐵線亦愈來愈擠迫。運輸及房屋局長陳帆噚日回應立法會質詢時就提到,換做8卡車後,2018年西鐵線可載客量比起2016年增加咗8%,但同期乘客量升幅更大,多咗10%,舊年西鐵線朝早繁忙嘅一小時,單向乘客量就超過4萬人。

每米企4人 載客率101%

如果以每平方米企6個人計載客率,舊年西鐵線朝早繁忙時間,最繁忙嘅一段路即錦上路至荃灣西,一小時載客率係72%,但近年政府同港鐵都承認,每平方米企6個人係唔現實,所以如果以每平方米企4個人計,載客率就高達101%。

陳帆又話,將來沙中線通車後,西鐵線會同馬鞍山線連接,成為「屯馬線」,港鐵會添置列車及提升信號,提供每小時每方向最高約24班次列車服務,可載客量比2015年增加約37%;港鐵亦會喺屯馬線通車後,按需要考慮增加班次,加強西鐵線服務。不過沙中線工程問題仍未解決,原本今年中通車嘅「大圍至紅磡段」,至今都未有通車時間表,睇嚟「迫爆」嘅狀况都會維持多一段時間。

相關字詞﹕陳帆 屯馬線 沙中線 港鐵 西鐵線

上 / 下一篇新聞