港聞

港聞二

下一篇
上一篇

城大之後 科大又切「燒豬」

【明報專訊】城市大學動物醫療中心之前切燒豬慶開幕,被網民留言質疑,校方其後解釋係基於傳統慶祝習俗,「有祝福之意」;呢份祝福,噚日就傳到去科技大學。只見科大校長史維同一眾嘉賓揸住把刀,笑笑口對準位,一刀切落隻「燒豬」度——睇真啲,原來係燒豬造型嘅蛋糕。

科大與陳妙蘭合辦蛋糕展

呢個燒豬蛋糕無肉香,又唔脆,咬落去係忌廉同朱古力,但外形、色澤、大小同真嘅燒豬差唔多,驟眼睇幾可亂真,原來佢係本地蛋糕店Christina's Creation創辦人、維他奶創辦人之一陳南昌嘅孫女陳妙蘭嘅出品。

30多作品 包括校園蛋糕

陳妙蘭以製作像真度高嘅3D蛋糕聞名,今次佢同科大合辦仿製蛋糕展覽,聽日起至5月28日,喺科大圖書館展覽廳展出30多個仿製蛋糕。最引人注目嘅係佢特別整咗一個約4呎長嘅科大校園蛋糕,外形跟足校舍設計,仲有科大門口地標「火雞」。其他仿製蛋糕展品仲有人咁高嘅婚紗、A380飛機、跑車、教堂、首飾盒、攝影機、可旋轉嘅賀年全盒等,睇到人流晒口水,不過呢啲蛋糕外面係翻糖,入面係泡沫,唔食得嘅。

相關字詞﹕動物保護 科大 城大

上 / 下一篇新聞