港聞

港聞二

下一篇
上一篇

陳維安稱一直「against」政治中立 泛民嘲鬼拍後尾枕

【明報專訊】《逃犯條例》修訂引起連番爭議,民主派其中一個矛頭指向立法會秘書長陳維安,質疑佢處理議會事宜唔中立。陳維安噚日朝早見傳媒,用中文回答提問時強調秘書處一直持守政治中立原則,但用英文重複呢番話時,就講話「We have always worked against this principle(我們做事一直違背這原則)」,民主派就乘機諷刺佢「鬼拍後尾枕」。

秘書處:against有他意

陳維安噚日花咗17分鐘見傳媒,其間有記者以英文發問,陳維安以英文回覆,話立法會秘書處自成立以嚟,多年來一直恪守政治中立(upheld our political neutrality),但接住嗰句就講錯咗。

立法會秘書處噚晚就為陳維安解畫,話英語「against」嘅字義除有「違反」嘅意思外,亦有「以…為標準」或「以…為背景」意思,所以可理解秘書長當時想表達嘅信息係「秘書處一直以政治中立為標準來辦事」。不過,秘書長都認為可用更好嘅用詞或表達方法,例如用 「according to」代替。

陳維安早年分別喺美國普林斯頓大學同哈佛大學取得學士同碩士學位,民主派會議召集人毛孟靜(Miss Mo)亦留意到陳維安發言,Miss Mo下晝見傳媒時,話從來唔會質疑陳維安英文水平,諷刺對方「百分百鬼拍後尾枕,講咗心裏頭說話」。

容海恩舉牌變「潛力圖」

另一焦點係新民黨容海恩,佢前日手持「這個不是會議!」紙牌走入立法會會議室,抗議民主派開會討論《逃犯條例》,呢一幕已成為「潛力圖」。有人改圖,將呢張相key入國家主席習近平主持嘅會議相片中;足球評述員劉舜文就喺facebook畫咗張容海恩手持「我需要睇德甲!」標語圖,仲畫自己坐喺主席台,化身「劉緊身」。

劉舜文本身係德甲球隊史浩克04擁躉,故「容海恩」衫就加上球會名稱。有網友就留言話,𠵱家香港立法會內戰,劉就回應話,「立法會內戰,中美貿易戰,我都看不透!都係睇德甲大戰開心啲!」

容海恩前日舉起「這個不是會議!」紙板,話唔承認民主派嘅會議,呢幕頓時成為「潛力圖」,足球評述員劉舜文就畫咗張容海恩手持「我需要睇德甲!」標語圖,仲畫咗自己坐喺主席台。

上 / 下一篇新聞