港聞

港聞二

下一篇
上一篇

沙中線重啟聆訊 大狀終於「有樣睇」

【明報專訊】沙中線紅磡站調查委員會再開延伸聆訊,噚日嘅初步聆訊都係講吓程序嘢。上年9月原調查開初步聆訊,來自英國嘅大狀都好緊張聖誕假,Emily見復活節剛過,嚟緊都冇咩大假,點知佢哋「目光遠大」,已經留意到兩個月後係暑假,擔心暑假後如果仲有其他嘢要再開聆訊處理,都可以知道幾時要返港。

英大狀提早擔心暑假工作

委員會主席夏正民仲講笑話,雖然佢離開咗大學「300年」,但都知有專家係大學教授,可能要用暑假改吓卷。港鐵代表、英國御用大律師Philip Boulding都加把口,話自己嘅仔女雖然已經20幾歲,但都知在座有律師嘅仔女讀緊書,可能要一齊放暑假。

Emily要讚吓聆訊室嘅設備有進步。過去聆訊室太細唔入得,Emily要喺出面房間睇電視,但熒幕中個個大狀都係「背多fun」,只睇到背影;噚日個鏡頭終於移咗位,Emily可以睇到大狀個樣之餘,熒幕仲有分鏡,可以睇埋夏正民嘅大頭。Emily仲留意到,聆訊室入面好似有人瞌眼瞓。

另外,代表禮頓嘅資深大律師石永泰噚日現身時拎住兩支拐杖,但就冇用到,見佢行路都好似比平常慢,Emily關心吓佢,佢冇講清楚係咪整親,只係話「仲行得」。希望半個月後調查委員會開始實質聆訊時,佢已經健步如飛啦。

上 / 下一篇新聞