港聞

港聞二

下一篇
上一篇

「無影」陳維安 睇泛民fb直播 岳少助理貼街招尋人

【明報專訊】今次《逃犯條例》法案委員會,立法會秘書處因為書面問議員係咪接納內會「DQ」涂謹申嘅指引,被民主派批評為「政變」。民主派噚日就踩上秘書長陳維安嘅房間要求會面,等待良久都未見人。由公民黨黨魁楊岳橋助理營運嘅facebook專頁「810扮工室」就出post,話喺立法會外燈柱上張貼「尋人啟事」,問大家有冇見過陳維安,「此人於辦公時間失蹤,市民甚是掛念,如尋獲請通知810扮工室,無酬」。

「810扮工室」其後更喺立法會開live,聲稱要「接陳生放工」,不過等咗一段時間,佢哋就更新話陳維安走咗喇。

陳維安「潛水」,民主派下晝照原定安排開會,並喺fb開live。一般嘅會議,立法會秘書處都會做網上直播,噚日就無安排,但有人就發現陳維安嘅fb帳戶「Kenneth Chen Wei On」都有睇緊民主派自己做嘅直播,似乎秘書長唔現身,都相當關心呢個會議。

逾萬人聯署促辭職

陳:不偏不倚

陳維安一再堅稱秘書處中立履行職責,但仍成為眾矢之的,網上出現要求佢辭職嘅聯署,直至噚晚10點半有逾1.5萬人參與。聯署批評秘書處淪為政治打手,越俎代庖以至越權行事,從根本上失去服務立法會嘅中立角色,破壞信任、失職失德。

陳維安晚上書面回應,話秘書處一直恪守不偏不倚原則,繼續以專業、中立嘅態度,履行支援立法會嘅職責。

相關字詞﹕法案委員會 公民黨 涂謹申 楊岳橋 民主派 逃犯條例

上 / 下一篇新聞