港聞

港聞二

上一篇

土力處好媽媽 監測山泥守護孩子

【明報專訊】下星期日就係母親節,發展局長黃偉綸噚日喺網誌話會一連兩星期介紹兩個同事兼好媽媽,先介紹喺土力工程處擔任土力工程師嘅丁瑞民,讚揚佢「巾幗不讓鬚眉」。

丁瑞民主要負責協助統籌土力工程處山泥傾瀉緊急服務。每當天文台發出山泥傾瀉警告、掛8號或以上颱風時,土力處緊急事故控制中心就會啟動,處理山泥傾瀉事故,丁瑞民負責統籌各項支援,包括調動人手、確保儀器正常運作、調派工程師盡快到山泥傾瀉現場評估等,所以成個雨季佢都要準備就緒。

舊年8月29號,天文台發出黃雨、紅雨同山泥傾瀉警告,粉錦公路多處山泥傾瀉,全線封閉,丁瑞民喺控制中心工作,立即派工程師到場視察,仲同承建商制定緊急維修工程,趕及9月3日開學前開通行車線。佢覺得做好山泥傾瀉緊急服務,守護市民安全,係好有意義。

丁瑞民育有一仔一女,佢話要兼顧工作、家庭同仔女學業,難免有壓力,但仔女係佢最大動力來源,又強調唔想做「怪獸媽媽」,唔會要求佢哋成績名列前茅,希望佢哋輕鬆愉快成長,但對品格會有要求。

上 / 下一篇新聞