港聞

港聞二

下一篇
上一篇

哪吒患血管瘤 唔動氣無事

【明報專訊】西貢區議員「哪吒」方國珊噚日喺facebook專頁發帖,話噚日早上喺瑪麗醫院接受磁力共振檢查,結果顯示「血管及腫瘤保持平穩」,令佢可以繼續以健康身體服務社會。帖文雖然無多講病情,但就有200幾人留言,希望佢保重身體。

方國珊同Emily講,佢所患嘅,係同公民黨余若薇同一類疾病。佢話其實去年喺立法會新界東補選嘅時候,已經提過佢喺2016年檢查身體時,發現患上腦血管瘤,不過為免被質疑工作能力,佢平時都唔會主動提及病情,不過就有定期覆診,至今無太大變化,對此表示感恩。

2016年檢查身體發現腦血管瘤

方國珊又話,2016年佢發現自己望住一個方向嘅時候,影像變得好光,所以先去檢查,發現咗呢個病,醫生話只要唔病發就無事,但就有叫佢平時唔好動氣。

方國珊話幾年前反對將軍澳堆填區擴建係最辛苦嘅時候,唔知係咪因為咁捱壞咗身體。佢又話近年已經「深居簡出」,有時間會爭取休息,希望喺工作同生活之間取得平衡,而最重要係市民認同佢嘅工作,咁佢做嘢就會有源源不絕嘅動力。

上 / 下一篇新聞