港聞

港聞二

上一篇

肥老闆生日 蛋糕打Paul牙骱軟

【明報專訊】經民聯金融服務界議員張華峰(肥老闆)前日生日,黨友噚日喺立法會幫佢搞生日派對,切蛋糕、開香檳,肥老闆話生日願望係「咩都順利,大家願望都可以實現」。除咗一班黨友,到立法會搵議員嘅教育局長楊潤雄亦有參加派對,局長對於飲香檳表示「不了」,借「要企喺記者嗰邊影相」婉拒。經民聯林健鋒(Jeffrey)充當主持人,話可以隨便問肥老闆3個問題,局長教路要「問冧把」、買同賣嘅日期,不過當然係講笑啦,投資涉及風險呀。

問到年齡秘密,肥老闆好含蓄咁話「上年攞到兩蚊搭車優惠」,換言之今年66歲喇。Jeffrey買咗兩個蛋糕賀壽,上面寫有「股市峰收」同「峰衣足食」。肥老闆係東坡肉愛好者,之前參加立法會長三角考察團一口氣食咗4舊,經民聯主席盧偉國就話親自下廚整畀肥老闆食。

獨立嘅謝偉俊(Paul)同太太白韻琹路過,一齊同肥老闆慶祝,Jeffrey話Paul「遲早都加入經民聯」,黨友梁美芬就請Paul食蛋糕,話「蛋糕打人牙骱軟」。

上 / 下一篇新聞