港聞

港聞二

下一篇
上一篇

總幹事約滿離任 旅發局全球獵頭

【明報專訊】啱啱換主席嘅旅遊發展局,又有人事變動,做咗12年嘅總幹事劉鎮漢(Anthony),7月31日約滿後離任。

旅發局無交代Anthony嘅新去向,佢未夠58歲,照計未夠鐘退休,Emily聽聞新任主席彭耀佳同政府都想佢留低,但佢以個人理由選擇離開。同佢共事嘅人話,咪睇Anthony平時笑騎騎,其實佢要求好高,做咗咁耐,可能想停一停。

距Anthony離職唔夠3個月,旅發局要全球獵頭搵第一把手係有啲趕,萬一搵唔切,聽聞可能要副總幹事頂住先。

據旅發局新聞稿,彭耀佳對劉鎮漢離任感惋惜,但尊重佢嘅決定,代表旅發局衷心感謝佢多年來致力推廣香港,並為香港旅遊業作出重大貢獻。

有旅發局員工同Emily講,知道Anthony要離開都好難過同唔捨得,讚佢盡心盡力,尤其初加入嗰幾年,根本無放過假,不停帶領同事推出一個又一個campaign,仲話佢係好勤力嘅老闆,唔止叫下屬做,亦親力親為。

上 / 下一篇新聞