港聞

港聞二

下一篇
上一篇

聶德權郭家麒 為「起來婆婆」駁火

【明報專訊】由全國政協委員霍啟剛出任主席嘅「香港各界青少年活動委員會」,近日推出3分鐘嘅國歌短片,搵嚟一班名人上鏡獻唱,一個坐輪椅嘅婆婆聽到國歌奏起,都要撐住拐杖、由旁人攙扶下起身肅立唱歌。公民黨立法會議員郭家麒噚日喺《國歌法》法案委員會上批評,要老人家聽到國歌「彈起身」顯示愛國精神係「低級趣味」,要求政制及內地事務局長聶德權公開譴責咁樣係傷害老人家。

郭家麒話聞歌彈起低級趣味

聶德權澄清,郭家麒所指嘅宣傳片唔係政府製作,政府支持民間推出推廣國歌、尊重國歌嘅宣傳片。佢又話自己都有睇到相關片段,「如果嗰位婆婆想起身表達對國歌嘅尊重,佢又起到身,完全無問題」。佢強調,上次會議已經講咗若因身體狀况企唔到起身,喺奏唱國歌場合唔站立係完全無問題。郭家麒斥聶德權唔譴責,仲要贊成,係逼殘障者要企起身。

民建聯漁農界議員何俊賢提出規程問題,話片段中嘅婆婆係東江縱隊抗日老戰士,心口掛住獎章,非常有愛國情懷,反而郭家麒嘅講法係侮辱。

聶德權亦都反駁,話郭家麒嘅言論同指摘與事實不符、十分不負責任。

上 / 下一篇新聞