港聞

港聞二

上一篇

「司徒華獎」得主拍片 為教師打氣

【明報專訊】教育界最近氣氛麻麻,一班「司徒華獎」得獎者拍咗一段片幫學界打氣。佢哋異口同聲話,做教師工作唔易,又忙又成日加班,不過佢哋仍然好熱愛份工作,覺得教書好有意義。

好似第三屆司徒華獎得主、伊斯蘭脫維善紀念中學老師王家俊就話,𠵱家做教師壓力好大,要照顧學生唔同需要,又有好多文件工作,工時長,但佢相信「播下小種子,將來成大樹」,做老師嘅一言一行都好影響學生成長,希望同工都可以繼續抱持住一顆熱誠嘅心。退休教師高長泉就話,𠵱家教育環境比佢當年更惡劣,教師面對唔同挑戰,仍為學生成長努力不懈,令人敬佩。

教協創會會長司徒華2011年離世後,教協成立咗「司徒華教育基金」,將佢有教無類、生命影響生命嘅精神承傳下去。基金每年都舉辦「好學生.好老師」表揚計劃,咁多年來嘅得獎者都喺教育界發光發熱。今年提名期開始咗喇,有學生、老師組別,仲新增咗任教年資不超過5年嘅「新晉老師」組別,31日截止提名。

相關字詞﹕有教無類 教育界 教師 司徒華獎

上 / 下一篇新聞