港聞

港聞二

下一篇
上一篇

鴨寮街公廁翻新 泳舜話保養要緊

【明報專訊】政府喺今年份《財政預算案》預留6億元翻新全港240個食環署管理嘅公廁,民建聯立法會議員鄭泳舜日前拍住該黨嘅深水埗區議員劉佩玉,去視察公廁翻新情况。佢哋先去睇未翻新嘅北河街公廁,Emily睇住相關片段,彷彿隔住個熒幕都感覺到有幾污糟,地下有污水,啲燈光昏昏暗暗咁。鄭泳舜話裏面唔多通風,仲有幾格廁所係壞咗。其實,北河街公廁係民建聯今年2月做嘅「最差公廁大搜查」中排第7嘅最差公廁。

究竟政府翻新公廁嘅成效係點?佢哋再聯同食環署幾名總監,一齊去睇翻新咗嘅鴨寮街公廁,劉佩玉話通風系統改善咗、光猛咗,仲有育嬰板;而鄭泳舜話希望未來政府用多啲科技除菌除臭,將來投標唔好淨係「價低者得」,亦要求保障清潔工友權益等。佢哋參觀嘅時候,鴨寮街公廁仲未開放,新簇簇當然乾淨企理,鄭泳舜亦話保養比翻新重要。

相關字詞﹕深水埗 公廁 鄭泳舜

上 / 下一篇新聞