港聞

港聞二

下一篇
上一篇

名人唱國歌宣傳 輪椅婆婆肅立搶鏡

【明報專訊】立法會正審議《國歌法》草案,由全國政協委員霍啟剛出任主席嘅「香港各界青少年活動委員會」,近日就推出宣傳國歌短片,搵嚟一班名人上鏡獻唱,同時穿插市民唱國歌嘅畫面,全長近3分鐘。最搶鏡嘅可謂一名坐住輪椅嘅婆婆,佢聽到國歌奏起時,都要撐住拐杖、由旁人攙扶下起身肅立唱歌。

《國歌法》列明,出席奏唱國歌場合嘅人須肅立,政府多次強調呢項屬指引條文,不帶罰則。國歌法草案委員會上月中舉行會議,工黨張超雄曾提及,有人或因為身體情况無法肅立,條文要求出席場合者要肅立係唔合理。政制及內地事務局長聶德權當時解釋,如果有人因身體狀况未能肅立,政府完全理解,唔會因此懲罰相關人士。

盛智文獻唱表達愛國精神

現身短片嘅名人,除咗成龍同譚詠麟等藝人,亦有政商界人物,包括已入籍中國嘅「蘭桂坊之父」盛智文,佢用中文唱咗兩句,喺片末轉番頻道用英文話,以中文唱出國歌,表達愛國精神,感覺好好咁話。霍啟剛喺片末形容,每一個香港人聽到國歌時,都感到好驕傲;全國人大代表鄺美雲就話,尊重祖國等於尊重自己。

相關字詞﹕霍啟剛 國歌 國歌法

上 / 下一篇新聞