港聞

港聞二

下一篇
上一篇

批政府「當13萬人無到」 田少:咩數字先可觸動政府?

【明報專訊】星期日嘅反對修訂《逃犯條例》遊行,主辦方民陣話有13萬人參加,警方話高峰時有2.28萬人;政務司長張建宗當日話遊行人數多寡唔係重點,近日政府亦表明想盡快通過修例。一直反對修例嘅自由黨榮譽主席田北俊(圓圖)就喺facebook度質疑:「政府真係當十三萬人無到㗎喎。」

「人數不重要 咁乜嘢重要?」

2003年政府推動緊《基本法》23條立法,田少喺七一50萬人大遊行後,突然倒戈反對立法,仲辭任埋行政會議成員。佢噚日喺fb上話係「五十萬人感動咗我」,又問「唔知今次要咩數字,先可以輕輕觸動政府?」佢仲hashtag以下提問:「人數真的不重要?咁乜嘢先重要?香港人仲可以點?」

田大少又上載咗張相強調,香港同內地無移交逃犯係用嚟保障港人、「一國兩制」同高度自治,成為香港獲世貿或美國特別貿易優惠嘅理據,唔係政府所講嘅漏洞。睇番今次嘅《逃犯條例》修訂事件,大少嘅細佬田北辰亦建議政府應撤回修例。

大少呢個post出咗24個鐘,獲得近4000個like,係近一年佢得到最多like嘅post。公民黨主席梁家傑都有喺fb度轉貼,質問「林鄭月娥,你要幾多香港人上街先會停止將我哋『送中』?!」有網民就留言畀田大少,叫佢促請自由黨黨友到時投反對票,講多無謂。

相關字詞﹕23條立法 自由黨 梁家傑 逃犯條例 田北俊

上 / 下一篇新聞