港聞

港聞二

下一篇
上一篇

案件兩年工作 陳淑莊:師父只收60萬

【明報專訊】佔中9人案8人已判刑,因為要做腦部手術而獲押後判刑嘅公民黨陳淑莊(Tanya),官司中由其師父、「刑事四大天王」之一嘅資深大律師王正宇代表。有傳媒日前指王正宇喺案中收取7位數字「友情價」訟費,Tanya噚日發文反駁,話自己冇咁多錢,「記者太睇得起我」。佢透露師父同法律團隊兩年來嘅工作,只係象徵式收取60萬元,Tanya亦得到守護公義基金全數捐助,自己已向立法會申報。

讚師父有才華 作曲為你鍾情

講到師父,Tanya尤其感觸,佢話20年前學師時,點會想像到有朝一日因為佔領運動而被人告、師父義不容辭做咗佢嘅代表律師。佢又話,師父喺法庭通常神色凝重,唔好以為佢為人古肅,其實佢有另一面才華,張國榮名曲《為你鍾情》就係由王正宇作曲,師父都係唱得之人。

守護公義基金周日籌283萬

守護公義基金周日遊行時設街站籌款,包括協助佔中9人案上訴之用。基金信託人何秀蘭(Cyd)同Emily講,各政黨同基金本身共籌得約283萬元,當中基金同工黨籌得230萬元,立法會前議員劉小麗籌得41萬元,香港眾志就籌得約9.1萬元。另外,社民連籌得74萬,主席吳文遠話,由於該黨仲有多宗政治檢控官司要負擔龐大訟費,故未能為基金籌款。

相關字詞﹕檢控 守護公義基金 張國榮 藝人 立法會議員 陳淑莊 佔中 佔中九子 emily

上 / 下一篇新聞