港聞

港聞二

上一篇

國慶70年 鄉局辦新界馬拉松 新任女鄉頭:局內男女好平等

【明報專訊】今年係國慶70周年,新界鄉議局打算第四季喺「蓮塘/香園圍口岸」搞「新界馬拉松」慶祝。鄉議局噚日開例會,負責嘅總務委員會主任鍾偉平話,運輸及房屋局好積極協助,運輸署同其他相關政府部門會處理封路、交通改道等措施。

噚日亦係27個鄉事委員會選出新一屆領導層後,首次嘅鄉議局例會,鄉議局主席劉業強喺會上報告荃灣、屏山、青衣等11個鄉委會都選出新「鄉頭」,東涌同打鼓嶺鄉委會更選出兩名女鄉頭,分別係黃秋萍同陳月明,劉業強話係鄉議局成立93年來首次,而新一屆鄉頭平均年齡約59歲。黃秋萍同Emily講,鄉議局內男女非常平等,佢日後都會多同陳月明合作。

鄉議局執委會6月會改選,劉業強早講過會競逐連任主席。噚日會議上,錦田鄉委會主席鄧賀年就發言話代表27個鄉委會正、副主席支持劉業強連任,話劉當主席嘅4年盡心盡力,成績有目共睹,𠵱家政治形勢多變,希望劉業強繼續帶領鄉議局向前奮進。

劉業強就承諾喺任何平台都會捍衛原居民權益。

相關字詞﹕新界鄉議局 馬拉松

上 / 下一篇新聞