港聞

港聞二

下一篇
上一篇

許志安黃心穎醜聞 全城抽水 趙家賢提「馬明住處」捱批

【明報專訊】歌星許志安與藝人黃心穎喺的士內親熱嘅新聞,引起全城討論,唔少網民好關注黃心穎男友馬國明同許志安妻子鄭秀文。東區(太古城西)區議員、民主動力召集人趙家賢一向事無大小都放上facebook,噚日佢就喺fb上出「區務報告」,話因應重大娛樂新聞,已要求管理公司特別加強「#馬國明 居住大廈的保安措施,防止狗仔隊/閒雜人等進入」。有網民留言話「原本唔知馬生住邊,而家知了」。家住海怡半島嘅香港眾志秘書長黃之鋒轉貼趙家賢嘅post,亦話「多得趙博士先知道佢(馬國明)住太古城」。

九巴提醒巴士都有車cam

趙家賢喺黃之鋒個post度反駁,話之前傳媒都報道過,所以唔係秘密,但就被揶揄「難道你打算工作報告會列入呢項事宜?」。過咗無耐「趙博士」就刪咗原post,再發另一帖文及附有娛記訪問馬國明家人嘅相片,今次趙家賢冇特別提馬國明個名,又不點名咁話有人「網絡欺凌」、「我住太古城某人住海怡都係公開資料啦」。

呢單娛樂新聞亦引發唔同機構嘅社交媒體小編抽水抽到盡頭,好似九巴個fb專頁就提大家巴士上都有cam、「車廂嚴禁偷食」。今次事件,主角許志安噚晚話當日飲咗好多酒,生力啤酒個fb就話「酒後八分醒」,提醒大家「#酒後要清醒 #慎防意外生 #暢飲有責」。廉署社區關係處嘅fb專頁亦出圖諷刺,形容「做過梗有痕跡」,並標注「以為瞞天過海其實係你愚瞞」等字眼。

相關字詞﹕趙家賢 黃心穎 馬國明

上 / 下一篇新聞