港聞

港聞二

下一篇
上一篇

政制局被譏黑洞 「樣樣嘢有入無出」

【明報專訊】人類首次成功「拍攝」黑洞嘅照片上周發布,全球矚目,原來香港都有個「黑洞」?話說立法會政制事務委員會噚日開會,討論聯合國人權理事會普遍定期審議工作組就香港所做嘅審議,其間爭取性小眾平權組織「女角平權協作組」成員楊煒煒形容,政制及內地事務局就係香港嘅黑洞,「負責嘅嘢每樣都係有入無出、音信全無,穿過政制局後,時間都被吞噬,負責工作全部遲遲冇影」。

楊煒煒舉出多個例子,好似局方4年前聲稱要做不歧視性小眾約章、研究海外性傾向歧視立法經驗,至今無影;強調要求政府立即展開性傾向歧視立法工作。人民力量陳志全喺會上話,有外國代表喺聯合國會議上,建議中國打擊基於性取向、性別認同嘅歧視,中方亦表示接受,質疑中國都話會做,如果香港唔做「點講得通」。佢又一再問政府幾時落實性傾向歧視法例,「係咪要等大陸都立咗,我哋先立?」

政務司長張建宗就話,已經有一連串工夫做緊,希望鼓勵不歧視嘅文化,但立法有爭議及複雜,強調要小心處理。

相關字詞﹕聯合國人權理事會 歧視 黑洞 政制及內地事務局 聯合國 張建宗

上 / 下一篇新聞