港聞

港聞二

下一篇
上一篇

宣傳樓宇安全 屋署派3萬支雪糕

【明報專訊】一年一度嘅「樓宇安全周」又嚟喇,為咗加強宣傳,屋宇署今年有新搞作,由本月14號至27號一連兩星期,每日喺指定地點派軟雪糕,市民只要like或follow屋宇署嘅facebook或instagram,就可以免費拎一杯軟雪糕,架雪糕車更加係度身訂做,幫手宣傳「樓宇安全周」,希望令更多人知道有呢個活動。每日派雪糕嘅時間表可以喺屋宇署fb或ig搵到,署方話雪糕數目有限,送完即止。

唔少網民都有排隊拎雪糕,有網民就問,派雪糕同宣傳樓宇安全有咩關係?Emily問過屋宇署,署方話一直構思各樣創新宣傳吸引公眾,今次免費派雪糕,雪糕紙筒同雪糕車身都以「樓宇安全周」嘅設計做主題,市民排隊拎雪糕時,可透過QR Code先瀏覽活動資料,且希望藉住雪糕帶出反思,「當我哋拎住軟雪糕筒時,會盡快食咗佢,但當我哋面對樓宇安全問題時,會唔會都適時處理佢?」署方話整個活動會喺各區派大約3萬支雪糕。

講番「樓宇安全周」,今年主題係「活在當廈」,屋宇署將於4月27號喺「大館」搞開幕禮,之後有連串活動,包括有唔少同樓宇維修及防止圍標有關嘅講座,本月30號屋宇署樓宇資訊中心亦會舉行開放日等,有興趣市民可以上屋宇署網頁報名。

相關字詞﹕送雪糕 樓宇安全周 屋宇署

上 / 下一篇新聞