港聞

港聞二

下一篇
上一篇

特首與董握手後準備離開 王志民「追住」林鄭握手

【明報專訊】特首林鄭月娥同中聯辦主任王志民上月出席慈山寺佛教藝術博物館啟用儀式時,富商李嘉誠「撮合」兩人握手,林太當時未有伸手嘅畫面引嚟政界耳語;兩人噚日再次同場出席活動,喺台上大合照後,林太主動向企喺佢右邊嘅前特首董建華伸手握手,之後轉身離開;王其後追上前邀請林太握手,並轉身面向傳媒鏡頭,畀大家影低呢一幕,兩人面掛笑容,王志民更向記者揮手。

王轉身面向傳媒

兩人噚日出席智庫香港願景舉辦嘅「全民國家安全教育日香港研討會」,完場大合照後,林太同右方嘅董建華握手後就轉向另一邊準備離開主禮台,經過企喺左方嘅王志民面前,王略略低頭,疑似望咗一下林太隻手,林太隻手亦有輕微動作。當林太行到台邊時就突然停步並回頭,與從後步至嘅王志民交談幾句後,兩人握手並面向傳媒所在方向畀大家影相,笑得非常燦爛,現場亦傳出一陣笑聲。

噚日研討會有多名嘉賓演講,除咗林太同王志民外,警務處長盧偉聰同全國政協常委陳馮富珍等亦有致辭,都講普通話。盧偉聰嘅普通話似乎仍有進步空間,部分字詞發錯音,例如國家嘅「家」字,讀成粵語「揸」音,果斷執法嘅「斷」字就讀成粵語「啄」音。陳馮富珍跟稿發言時就一度忘記讀到邊,佢笑言自己年紀太大,引嚟一番笑聲。

相關字詞﹕王志民 林鄭月娥

上 / 下一篇新聞