港聞

港聞二

下一篇
上一篇

蝦碌倒掛國旗 中聯辦道歉

【明報專訊】國旗係國家嘅象徵,不過升掛國旗有時都難免會出現「蝦碌」,而今次出錯嘅,就係中央駐港機構中聯辦,引起網民熱議。話說網上噚日流傳一張國旗倒掛嘅相片,發帖者話朝早7點時,見到中聯辦大樓門外嘅國旗竟然倒掛咗,呢位網民即刻影低擺上facebook,仲問「今日係咪特別日子?」Emily見到即刻趕去望吓,發現國旗已回復原狀。

話保安出錯 上級已嚴肅批評

呢張相引起網民熱議,噚晚已有逾600個網民轉發,有人笑言中聯辦「反了」;亦有網民話替掛國旗嗰位人兄擔心。

中聯辦中人向Emily話,噚日朝早一發現掛旗錯誤後,即刻調查,發現係前線保安人員忙中疏忽,將國旗倒掛咗,佢哋知道後馬上糾正,而上級亦已對當事人員嚴肅批評。佢又話中聯辦感謝香港社會各界嘅關心關注,並對今次事件鄭重道歉,今後一定會改進管理,唔畀同類事件再發生。

鄭松泰:如可道歉了事,

我唔使留案底

曾喺立法會倒插國旗被判罪成嘅立法會議員鄭松泰噚晚喺fb話,如果倒掛國旗道歉可以了事,佢就唔使被罰5000蚊、留案底,再失教席啦。

上 / 下一篇新聞