港聞

港聞二

下一篇
上一篇

贏新同盟任啟邦 民記黃碧嬌掌大埔區會

【明報專訊】大埔區議會原主席張學明早前放棄連任鄉事委員會主席,失去當然議員身分,令區議會主席一職亦懸空。本身為大埔區議會副主席嘅民建聯黃碧嬌,噚日競逐主席,民主派就派出新民主同盟任啟邦挑戰,最終黃碧嬌以14票當選主席,任啟邦獲民主派6票,另外亦有1票白票。黃碧嬌本身嘅副主席職務,嚟緊亦將補選。

候選人發表政綱期間,嬌姐強調當選後會以「多反映、多表達、多轉介」嘅態度服務一眾區議員,亦強調會「共商議題,民生優先」。任啟邦則以「不可能的任務——Mission Impossible」形容今次參選,但都希望透過有競爭嘅選舉,提升區議會議政質素,亦建議加設直播功能等,希望區議會透明化。

另外,政府噚日刊憲,宣布元朗新田區議員文光明嘅議席,由3月8日起懸空。文光明因為早前喺4年間,虛報聘請一名男子為兼職助理,詐騙14.7萬營運開支償還款額,被裁定欺詐罪成判囚8個月。根據《區議會條例》24條,如當選後被判監超過3個月,而唔能夠選擇以罰款代替監禁,就會喪失議員資格。

相關字詞﹕大埔區議會 鄉事委員會 區議員 欺詐 民主派 民建聯

上 / 下一篇新聞