港聞

港聞二

下一篇
上一篇

《紐時》CEO來港演講:未來新聞來源中心喺亞洲

【明報專訊】《紐約時報》近年喺網上嘅表現石破天驚,行政總裁Mark Thompson可說功不可沒,佢近排嚟咗香港,噚日為一個午餐會作演講嘉賓,講吓報業經營心得。

Mark喺2012年加入《紐約時報》,幾年間將紐時嘅電子訂閱數字推過100萬大關,打破傳媒業嘅紀錄。Mark嘅口頭禪係,紐時有優質新聞、深入嘅偵查報道,關鍵係要懂得利用科技推銷畀讀者。

喺30多年新聞生涯中,Mark試過被批評偏袒以色列,唔夠公正。不過,佢噚日評估未來世局時就「政治正確」咁話,白人要擺脫過去嘅睇法,有色皮膚嘅人喺現今世界事務同科技領域已經大有角色。佢相信,未來新聞嘅來源中心會係中國同亞洲,而且中國喺人工智能等科技領域更站喺世界前沿。紐時喺北京、上海等中國大城市開咗記者站,而喺香港嘅新聞中心更增至50多人,準備好迎接新聞新世紀嘅到來。

同香港不少報紙一樣,紐時嘅實體報紙業務仍然係公司主要收入來源;Mark話,關鍵係同時要開展網上新路,為未來準備。Mark特別提醒,優質可靠嘅新聞信息始終最關鍵,所以開發網上新路嘅同時,一定要保持新聞質素,不能減少喺新聞部嘅投資,亦不應減少人手。午餐會短短兩個鐘,Emily獲益良多,連邀請Emily去食飯嘅長實老朋友都話,大家都係傳媒人,有更多時間交流就好喇。

上 / 下一篇新聞