港聞

港聞二

上一篇

油尖旺11間戲院最多 大埔區將零的突破

【明報專訊】成日有人話「土地分配不均」,噚日Emily睇立法會財務委員會審核2019/20財政年度開支預算,發現香港地戲院分佈都好唔平均。根據商經局回覆立法會嘅數字,油尖旺區有11間戲院、超過1萬個睇戲座位,冠絕18區,並拋離排第二、約有4000個位嘅觀塘區;18區中只有一區完全無戲院,就係有30幾萬居民嘅大埔區,反而人口少一大截嘅離島區都有1間戲院,有350個睇戲座位。

不過政府答覆中亦補充,根據業界提供嘅資料,今年上半年大埔區會有新戲院開幕,到時就全港區區都有戲院喇。

睇戲一向係市民一大娛樂,政府都有出招幫香港電影業,過去「電影製作融資計劃」已資助30幾套港產片,其中羅啟銳執導、張婉婷監製嘅《歲月神偷》收得最好,票房有2310萬元,套戲當年仲攞埋柏林電影節新世代最佳電影水晶熊獎,係第一次有香港電戲有呢項殊榮。《那夜凌晨,我坐上了旺角開往大埔的紅Van》就有2130萬元票房,《逆流大叔》、《狂舞派》同《分手說愛你》嘅票房都收過千萬。

上 / 下一篇新聞