港聞

港聞二

下一篇
上一篇

選民登記冊遺失 梁志祥:公僕少誠信培訓

【明報專訊】立法會財委會一連五日舉行特別會議,審議各部門嘅年度開支,噚日先討論公務員事務、特首辦、廉署等。選舉事務處一本載有2016年立法會選舉葵青區約8000名選民資料嘅登記冊不知所終,民建聯新界西議員梁志祥喺會議上,就將事件拉到公務員身上,問點解16萬公務員,但每年上誠信課程嘅只有2萬幾人,「唔怪得會出現失去選民冊啲咁令人驚訝嘅事啦」。

公務員事務局長羅智光話,好重視公務人員嘅誠信,每年會盡量提供多啲課程畀公務人員,又話除咗親身上堂,仲有網上自學課程。根據政府書面答覆,公務員培訓處、廉署及其他部門過去3年每年舉辦約710個防貪講座、誠信簡介會及避免利益衝突等培訓課程,每年平均約有2.8萬人參加。

區軒質疑公帑「在囚支援」曾蔭權

另外,議會陣線區諾軒提到,過去3年前特首曾蔭權有部分時間在囚,但佢嘅前特首辦公室繼續有開支,質疑係咪向曾蔭權提供「在囚支援」。署理行政署長鄭錦榮話,每名前特首都有一個高級私人助理、一個助理文書主任及一個貴賓車司機,涉及每年約140萬至160萬元薪酬,而過去3個年度佢哋都有喺前特首辦內工作,所以有支出。區諾軒批評做法荒誕;熱血公民鄭松泰就質疑曾蔭權因任特首時干犯罪行而入獄,應要「搣柴」,唔應該預留資源畀佢。

相關字詞﹕曾蔭權 公務員學院 公務員事務局 梁志祥

上 / 下一篇新聞