港聞

港聞二

下一篇
上一篇

馬恩國強姦非禮比喻佔中 黃浩銘:公民抗命係為公眾利益

【明報專訊】佔中9人案聽日宣判,被告之一、社民連副主席黃浩銘噚日喺港台節目《城市論壇》上,同「保普選反佔中」大聯盟義務法律顧問馬恩國等,激辯佔中理念同影響。馬恩國席間以求愛不遂比喻佔領運動,強調所有政治訴求都應該喺法律框架之內爭取,話如果有人向心儀對象送花,對方仍唔接受,「唔通非禮、強姦佢?」阿銘反駁,強調非禮同強姦等係為私利,但公民抗命係為公眾利益。

阿銘以甘地同曼德拉等歷史人物為例,形容參與公民抗命嘅人,都知道自己嘅去路會係監獄,形容監獄係公民抗命者嘅「必經之路」,強調佢哋爭取嘅係社會美好將來。

缺席平反六四議案

梁美芬:因為我兩邊都唔幫

另一出席論壇嘅經民聯副主席梁美芬(Priscilla),批評佔中9人只顧自己嘅崇高理念,卻站喺市民同一國兩制利益嘅對立面,佢希望各方爭取民主時都應該有對話,唔應該將年輕人推向牢獄。

阿銘喺節目休息時間,就翻Priscilla「舊帳」,話對方喺內地八九民運期間,曾以記者身分形容當時學運相當和平,質問Priscilla點解入咗立法會之後,多次缺席有關平反六四嘅議案。Priscilla回應話「因為我兩邊都唔幫」,阿銘反問佢係咪覺得共產黨「幫唔落」,Priscilla未有再回應。

相關字詞﹕梁美芬 黃浩銘 佔中9人案 馬恩國

上 / 下一篇新聞