港聞

港聞二

下一篇
上一篇

國史中心辦團 五四100年 飛巴黎考察

【明報專訊】今年係五四運動100周年,由教評會主席何漢權任校長嘅「國史教育中心」,噚日介紹中心一系列紀念活動,包括講座、徵文比賽同歷史人物選舉等,中心更會組織9天考察團,喺暑假帶領近30名中學生遊歷北京、法國同比利時,何漢權形容「歷史不是死的」,相信透過考察並介紹歷史,學生會更入腦。

何漢權話,中心正尋找資源贊助學生參加,正向優質教育基金申請撥款,亦會向善長募捐,每名學生旅費最少3萬元,中心希望能最少贊助到一半旅費。佢話中心歡迎中學生參加,佢哋要先寫文簡單講吓對五四運動嘅睇法,中心最後會選出25至30人,佢哋考察歸來要寫篇遊記回顧。

負責帶團嘅歷史學家丁新豹話,考察團會先喺北京參觀學生運動發源地及博物館等,之後飛巴黎,到訪當年簽訂《巴黎和約》嘅地方凡爾賽宮,亦會參觀埋葬一戰華人後勤人員嘅墳場,最後到一戰主戰場比利時參觀。今年亦係六四事件30周年,問到中心會否辦相關活動,何漢權話對六四事件「唔會唔講」,有應邀出席學校六四講座,但強調「歷史一件還一件」。

上 / 下一篇新聞