港聞

港聞二

下一篇
上一篇

論領展 何啟明先問局長有冇前女友

【明報專訊】立法會噚日辯論「要求政府解決民生三座大山」議案,一講到港鐵、領展、強積金對冲三座大山,一眾議員都有唔少嘢講。工聯會何啟明發言時,突然問在場嘅政務司長張建宗、勞福局長羅致光,以及運房局長陳帆有冇前女友,搞到一眾官員好迷惘咁,何啟明仲要強調自己「我初戀女友就係我老婆,冇前女友」,佢到底想講乜?

原來何啟明想講,領展就好似政府嘅前女友,「對佢甩晒又冇可能」,糾纏不清搞到現任極度不滿,「陳帆局長,試想吓你前女友成日喺你老婆面前掩掩揚揚、傾偈話要合作,你老婆都會㷫啦」。

佢話政府同領展唔少合作要傾,就算「現任」要處理問題,前線地區同事都困難多多。

話「領剪」剪斷社區人情

何啟明仲拎埋道具鉸剪出嚟,笑言自從王國興冇做議員之後,工聯會都好耐冇出現道具,佢形容手上嘅係「領剪」,係剪斷社區人情味、關係網嘅「領剪」。

相關字詞﹕工聯會 強積金 領展

上 / 下一篇新聞