港聞

港聞二

下一篇
上一篇

公民黨黨慶 成「集郵」主角 判決前夕 淑莊獻唱眼濕濕

【明報專訊】公民黨噚晚喺金鐘舉辦13周年黨慶酒會晚宴。佔中九子案下周二裁決,或要入獄嘅副主席陳淑莊(Tanya)成為主角,黨慶上未有離愁別緒,不過當Tanya在台上獻唱陳百強嘅《深愛著你》,唱到「時日如飛/今天在我心裏/是充滿不褪的記憶」時,都忍唔住眼濕濕,台下隨即拍手鼓勵,表演後更有唔少人同佢擁抱打氣。黨魁楊岳橋致辭時就話,希望下年黨慶能夠「齊齊整整」。

楊岳橋盼下年「齊齊整整」

晚宴筵開38席,公民黨無邀請問責官員出席,但就有唔少外國駐港領事代表現身,港鐵車務總監劉天成同公司事務總監蘇家碧亦有出席。雖然Tanya喺立法會不時同港鐵針鋒相對,劉天成噚晚都有搵Tanya「集郵」。

唱完《深愛著你》,Tanya就唱咗梅艷芳嘅《夢伴》,更一度除去腰帶「釋放」丹田高歌。今年黨慶主題係「並肩向前」,楊岳橋致辭時形容香港面對好多挑戰,「快到下個禮拜都有」,寄語大家面對風浪時心存坦然。主席梁家傑就形容,面對前路,最緊要忠於自己。公民黨之後公布最終籌得285萬,稍高於去年籌得嘅270萬元。

上 / 下一篇新聞