港聞

港聞二

下一篇
上一篇

「三合一」記招捱批 林鄭:會從善如流

【明報專訊】特首林鄭月娥上周召開「三合一」記者會,將沙中線調查委員會中期報告、撤回三隧分流,以及《逃犯條例》修訂建議一次過公布,做法被記協質疑模糊焦點。體育、演藝、文化及出版界立法會議員馬逢國噚日喺「短問短答」環節就為記者發聲。佢提到記者會只提前兩小時通知媒體,令好多傳媒措手不及;一併交代3個議題,好多傳媒都認為市民難以消化、清晰了解內容,問林太以後會唔會考慮盡量避免搞「幾合一」記招。

林太解釋,記招翌日佢要外訪,權衡輕重下決定咁做,又強調當日記招長達兩小時15分鐘,長過《施政報告》記者會。林太仲話香港傳媒非常有水平,好多時通知行家召開記者會都係預早一個鐘左右,有時甚至連內容都唔講,所以唔認為大家會措手不及。不過林太都強調,若佢聽到聲音,認為要盡量避免,就一定會從善如流。

馬逢國話已代傳媒發聲

馬逢國事後見到Emily時主動話,朝早已代傳媒發聲,佢話都覺得採訪安排可以做得好啲,又認同政府此舉畀人感覺可能會模糊咗焦點。

上 / 下一篇新聞