港聞

港聞二

下一篇
上一篇

拎住一條文件繩 超雄為盲人發聲

【明報專訊】立法會議員張超雄噚日喺立法會特首質詢時間發言時,拎住一條政府部門以至一般學校或辦公室都會用嘅綠色文件繩(圖),提到全港唯一會製作呢款文件繩嘅盲人工廠,遲啲因為重建要由土瓜灣搬去屯門,200幾個工廠工友好擔心,而工友有智障人士、失明人士同精神病復康者,質問特首「有無憐憫之心」。

特首林鄭月娥就即時話當年,話佢做社署署長時,已經訪問過呢間工廠所屬嘅服務單位,佢一直重視殘疾人士就業,一個月之前已主動要求勞工及福利局長羅致光要認真妥善處理,又應承會親自處理;而涉及重建搬遷應該互諒互讓,好似之前觀塘展亮中心件事,最後大家都接受,希望今次都本住同樣嘅精神去處理。

張超雄聽到回答後就唔多同意,提起今次重建理應改善盲人工廠情况,所以應該喺當區搵地方畀工友過渡,唔應該要盲人去屯門(工作),形容政府「今次好明顯係考慮不周」。超雄話除咗文件繩,該廠仲有做銀行用嘅布袋、大學實驗室用嘅實驗袍。

上 / 下一篇新聞