港聞

港聞二

下一篇
上一篇

缺席提案 梁繼昌解釋屢改口 稱「係策略」 因未夠票

【明報專訊】會計界議員梁繼昌(Kenneth)噚日原本要喺立法會動議佢提出嘅《2018年專業會計師(修訂)條例草案》,但主席梁君彥宣布Kenneth不在席而唔處理。有關議程要重新喺議程排隊,Kenneth初時向傳媒強調自己在席,後來承認缺席,原因係法案未夠票,要再爭取時間拉票,但Emily向立法會不同黨派查詢,相信法案好大機會夠票。究竟係唔夠票定係甩漏變成「關鍵缺席」,相信只有佢自己先知。

法案不獲處理,Kenneth先指自己當時在席,主席裁決奇怪,一度將責任推畀同屬專業議政嘅莫乃光(Charles),話莫係法案委員會主席,程序上要先由Charles發言交代委員會報告,先到自己發言動議恢復法案二讀,佢話當時Charles都不在席。不過,其實議員動議法案,法案委員會主席唔一定要現身,但動議嘅議員必須出席。翻查片段亦顯示Kenneth唔在席,當時會議廳內泛民僅得民主黨胡志偉在席。

Kenneth之後再解釋,就話自己缺席係策略,因為法案尚未夠票,希望透過將法案重新排隊,爭取更多時間拉票。究竟係咪唔夠票?經民聯主席盧偉國同Emily講,以佢所知民建聯同工聯會都支持法案,雖然自己未認真研究黨內各人投票立場,但原則上唔會反對,故唔認為Kenneth嘅法案唔夠票通過。而公民黨、新民黨、大部分議會陣線成員及專業議政,都同Emily表態支持法案。

相關字詞﹕梁繼昌

上 / 下一篇新聞