港聞

港聞二

下一篇
上一篇

拾荒婦哭訴搵工被歧視 局長着搵勞處被批冷酷

【明報專訊】勞福局長羅致光近期處理長者綜援申請門檻備受非議,噚日佢出席立法會福利事務委員會公聽會,有出席嘅基層市民訴說自己嘅貧窮苦况,一名67歲女拾荒者提到,過去兩年搵咗10份工,都因為年齡問題而無人請,羅致光就叫婆婆可以去找勞工處幫忙,結果婆婆在議會內當場流淚,議員批評局長冷酷無情。

噚日公聽會主要討論本港貧窮情况,其中67歲嘅黃婆婆提到,自己係退休低層公務員,每月得3000蚊長俸,唔夠應付租金同其他生活開支,這兩年嚟搵過10份工,包括鐘點工、診所清潔工、連鎖快餐店職員等,但大部分人知道佢年齡之後都無咗下文,有啲仲連求職表格都唔派畀佢,「我哋面對貧窮,有時係好無奈、好被動,社會支唔支持長者係好重要……我見過好多份(工),無辦法,唯有執紙皮,政府成日叫長者搵嘢做,唔係唔搵,係搵咗,但政府都幫唔到我哋」。黃婆婆發言期間,忍唔住啜泣。

聞羅致光回應 拎紙巾痛哭

公民黨郭家麒同工黨張超雄要求羅致光回應如何幫到黃婆婆,羅致光話,勞工處有協助中高齡人士就業,「(黃婆婆)可以搵勞工處協助佢就業」。黃婆婆聽到後,搖咗下頭,之後更加拎住張紙巾痛哭,要身邊嘅其他出席者安慰。張超雄就批評羅致光冷酷無情,「黃婆婆嘅錯就係無搵勞工處」。

羅致光之後補充話,勞工處每年都幫數以萬計嘅求職者搵工,「希望勞工處幫到搵工有困難嘅朋友……係咪能夠解決晒所有問題呢,我相信係有難度嘅」。

相關字詞﹕emily 郭家麒 張超雄 拾荒者 長者貧窮 羅致光

上 / 下一篇新聞