港聞

港聞二

下一篇
上一篇

金澤培履新 首務「重建港鐵聲譽」

【明報專訊】港鐵上月宣布委任金澤培(Jacob,圖)為新任行政總裁,接替因為沙中線工程醜聞而提早退休嘅梁國權。金澤培噚日履新後,向全體員工發電郵,話上任後要優先處理3件事,包括重建港鐵嘅聲譽,特別係公眾對新鐵路項目嘅信心;繼續每日為幾百萬乘客提供安全可靠嘅服務;及確保港鐵龐大多元嘅業務喺本港同全球都營運暢順。

喺港鐵任職24年嘅Jacob話,對於自己能夠帶領港鐵4.8萬人所組成嘅跨國團隊,感到好榮幸,希望繼續同員工並肩作戰;又話深刻了解到港鐵過去幾個月面對極度嚴峻嘅挑戰,港鐵所管理嘅項目備受質疑,加上測試新信號系統時發生事故,引起公眾廣泛關注,令港鐵「金漆招牌」受損。佢認為,要實現目標,有賴港鐵員工之間開誠布公溝通,一起努力,希望員工繼續緊守崗位。

新任申訴專員趙慧賢亦喺噚日履新,接替劉燕卿。佢話好期待同新團隊一齊工作,會以公署一向嘅價值觀同使命繼續工作。佢又認同,公共行政無論何時都要公開、公正及具透明度,呢個亦係公署一貫做法。

相關字詞﹕申訴專員公署 港鐵 趙慧賢 金澤培

上 / 下一篇新聞