港聞

港聞二

下一篇
上一篇

任何仁識玩 4.1「開演唱會」 警察教防詐騙 黎明「被富婆操控」

【明報專訊】噚日愚人節,大家見到網上世界嘅消息,又分唔分到邊樣真、邊樣係笑話呢?政府唔少部門噚日亦喺facebook「應節」,一向幽默嘅消防處代言人「任何仁」都唔放過呢個機會,宣布舉辦「任何仁四月天演唱會」,乘機宣傳俗稱「AED機」嘅心臟除顫器好易用;警方就搵咗藝人黎明,話有「絕密錄音流出」,乘機宣傳舉報電話騙案。

任何仁扮《少林足球》唱歌一幕

話說消防處喺fb出post,話任何仁「香港巡迴演唱會九龍站一觸即發」,仲話只此一場,任何仁會又跳又唱,「有今生無來世,絕不加場」。到底「演唱會」唱咩歌呢?Emily睇過個post條片,見到任何仁模仿《少林足球》經典唱歌一幕,大唱「我用滅火筒,無敵滅火筒」、「你用AED,其實好易用」。任何仁歌喉五音不全,相信係為配合惡搞,所以唱成咁。

而警察fb亦上載咗短片講電話詐騙,片中藝人「黎明」聲稱自己喺內地被富婆操控、逼佢拍劇,叫受害人過數畀佢做贖金,等佢可以返香港參加金像獎,仲話成事之後會同評審講,「個獎同獎金都歸你」。但受害人過數後就隨即被封鎖,原來「黎明」係由騙徒用變聲器扮嘅。其後真正嘅黎明出場,就話「真係當我懵仔魚呀?我邊會拎到金像獎吖」,豁達中都有啲無奈。

相關字詞﹕黎明 任何仁 警務處 演唱會 消防處 emily

上 / 下一篇新聞